Тогтвортой дэлхийн төлөө гео-орон зайн инновацыг нэвтрүүлэх нь

Нэгдсэн Үндэстний байгууллагын дэргэдэх Дэлхийн гео-орон зайн мэдээллийн менежментийн Ази-Номхон далайн бүс /UN GGIM-AP/-ийн 12 дугаар Нэгдсэн чуулган 2023 оны 11 дүгээр сарын 06-ны өдрөөс 10-ны өдрүүдэд Бүгд Найрамдах Индонез улсад зохион байгуулагдаж байна.
Бүгд Найрамдах Индонез улсын Гео-орон зайн мэдээллийн агентлагтай хамтран зохион байгуулж буй тус нэгдсэн чуулган нь "Тогтвортой дэлхийн төлөө гео-орон зайн инновацыг нэвтрүүлэх нь" сэдвийн доор зохион байгуулагдаж байна. Энэ үеэр гишүүн улс орнууд Үндэсний орон зайн өгөгдлийн дэд бүтцийг байгуулах өөрсдийн мэдлэг, туршлагаа харилцан солилцож, суралцах боломжийг олгодог юм. Мөн улс орнууд тус бүрийн Үндэсний орон зайн өгөгдлийн дэд бүтцийг байгуулах үйл ажиллагаандаа Нэгдсэн Үндэстний байгууллагын дэргэдэх Дэлхийн гео-орон зайн мэдээллийн менежмент /UN GGIM/-ээс гаргасан зөвлөмжийн дагуу хамтын ажиллагаагаа бэхжүүлж, нэгдсэн ойлголтод хүрэх ач холбогдолтой юм.
Монгол Улсаас дээрх Нэгдсэн чуулганд оролцож, "Монгол Улсад Үндэсний орон зайн өгөгдлийн дэд бүтцийг байгуулах нь - Үйл ажиллагааны төлөвлөгөө" сэдэвт илтгэл тавин, манай улсын орон зайн өгөгдлийн дэд бүтцийн өнөөгийн байдлын талаарх мэдээллийг хүргэлээ.
Нэгдсэн чуулган нь Удирдах зөвлөлийн болон 4 Ажлын хэсгийн хуралдаанаар үргэлжилж байна. Тухайлбал, Нэгдсэн Үндэстний байгууллагын дэргэдэх Дэлхийн гео-орон зайн мэдээллийн менежментийн Ази-Номхон далайн бүс /UN GGIM-AP/-ийн Удирдах зөвлөлийн хурлаар үндсэн 5 асуудал хэлэлцсэний нэг нь зөвлөлийн бүрэлдэхүүнд шинээр гишүүн оруулах асуудлыг хэлэлцэж Бүгд Найрамдах Хятад Ард Улс, Бүгд Найрамдах Фижи Улс, Холбооны Бүгд Найрамдах Ардчилсан Балба Улс нар шинэ гишүүнээр нэмэгдэв. Түүнчлэн 4 Ажлын хэсгийн хуралдаанаар 2022-2024 онд тус бүрийн эрхлэх асуудлын хүрээнд хэрэгжүүлэх ажлын төлөвлөгөөг тодотгон дагаж мөрдөхөөр тохиролцов.
Нэгдсэн чуулганы төгсгөлд Нэгдсэн Үндэстний байгууллагын дэргэдэх Дэлхийн гео-орон зайн мэдээллийн менежментийн Ази-Номхон далайн бүс /UN GGIM-AP/-ийн 12 дугаар Нэгдсэн чуулганаас гарах тогтоолыг батламжилж 1 жилийн хугацаанд Ази-Номхон далайн бүс нутгийн улс орнууд Үндэсний орон зайн өгөгдлийн дэд бүтцийг байгуулах үйл ажиллагаандаа мөрдлөг болгон ажиллах юм.
https://www.un-ggim-ap.org/.../twelfth-plenary-meeting-un...