ЗАСГИЙН ГАЗРААС “НИЙСЛЭЛИЙН ГАЗРЫН ЭРХИЙН МАРГААН ТАСЛАХ ЗӨВЛӨЛИЙН БҮРЭЛДЭХҮҮН, АЖИЛЛАХ ЖУРАМ”-ЫГ ШИНЭЭР БАТАЛЛАА

Монгол Улсын Их Хурлаас 2023 оны 12 дугаар сарын 07-ны өдөр Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийг баталсан бөгөөд тус хуулийг дагаж Газрын тухай хуульд холбогдох нэмэлт, өөрчлөлт орсон.
Тус нэмэлт, өөрчлөлтөөр Газрын тухай хуульд “Газар өмчлүүлэх, эзэмших, ашиглах, чөлөөлөхтэй холбоотой гаргасан гомдол, Захиргааны ерөнхий хуулийн 94.2-т заасан хүсэлтийг хянан шийдвэрлэх чиг үүрэг бүхий орон тооны бус Нийслэлийн газрын эрхийн маргаан таслах зөвлөл ажиллана.” гэж, мөн “Маргаан таслах зөвлөлийн ажиллах журам, бүрэлдэхүүнийг Засгийн газар батална. Маргаан таслах зөвлөлийн ажиллах журамд хурлын ирц, зөвлөлийн гишүүдийн эрх, үүрэг, маргаанд оролцогчдын эрх, үүрэг, тайлбар, нотлох баримтыг хянах, дүгнэлт гаргах, шийдвэрлэх, зөвлөлийн шийдвэрийг мэдээлэх зэрэг асуудлыг тусгасан байна.” гэж тус тус заасны дагуу Нийслэлийн газрын эрхийн маргаан таслах зөвлөлийн бүрэлдэхүүн, зөвлөлийн ажиллах журмыг Монгол улсын Засгийн газрын өнөөдөр /2024.03.06/-ийн 09 дүгээр хуралдаанаар хэлэлцэн баталлаа.
✅Энэхүү журам батлагдсанаар иргэн, аж ахуйн нэгж, байгууллагын нийслэлийн Засаг даргын шийдвэртэй холбоотой маргаан, газар чөлөөлөх, газрын төлбөрийн ногдуулалт, нийслэл, дүүргийн газрын алба хариу өгөөгүй, хуульд заасан чиг үүргээ хэрэгжүүлээгүй, нийслэл, дүүргийн газрын албаны шийдвэрийг хүлээн зөвшөөрөөгүй тохиолдолд нийслэлийн газрын эрхийн маргаан таслах зөвлөлд гомдлоо гаргаж шийдвэрлүүлэх боломж бүрдэж байна.