ШИНЭЭР GNSS-ИЙН БАЙНГЫН АЖИЛЛАГААТАЙ СУУРИН СТАНЦУУД СУУРИЛУУЛЛАА

        Газар зохион байгуулалт, геодези, зураг зүйн ерөнхий газар нь 2024 онд улсын төсвийн хөрөнгө оруулалтаарСэлэнгэ аймгийн Хүдэр,  Баян-Өлгий аймгийн Ногооннуур, Увс аймгийн Тэс, Хэнтий аймгийн Дадал, Дорнод аймгийн Чулуунхороот сумдад навигацийн хиймэл дагуулын байршил тодорхойлох байнгын ажиллагаатай 5 суурин станцын иж бүрдлийг шинээр байгуулж байна.

Энэ ажлын хүрээнд Сэлэнгэ аймгийн Хүдэр (SEA3) сум, Хэнтий аймгийн Дадал (HEA3) суманд нийт 2 станцыг шинээр суурилуулан ГЗБГЗЗЕГ-ын байнгын ажиллагаатай суурин станцын удирдлагын нэгдсэн сүлжээнд 2024 оны 10 дугаар сарын 15, 25-ны өдрүүдэд холбож, статик хэмжилтийн өгөгдөл цуглуулах, хиймэл дагуулын бодит агшны засвар дамжуулалтыг хангасан шинэ станцуудыг үйл ажиллагаанд орууллаа.

Энэхүү станцуудыг ашиглалтад оруулснаар цаашид Монгол Улсын геодезийн тулгуур сүлжээг өтгөрүүлэх, газар хөдлөлтийн нөлөөгөөр үүсэх хавтангийн шилжилт, хөдөлгөөнийг урт хугацааны өгөгдлийн үр дүнд дүн шинжилгээ хийж тодорхойлох, бүс нутгийн геодезийн зураглалын сүлжээний нарийвчлал сайжрах, зам гүүр, барилга байгууламжийн бүтээн байгуулалтын ажилд хиймэл дагуулын бодит агшны засвар дамжуулалт (RTK)-ыг ашиглах боломж бүрдэх юм.

Мөн тухайн сум орон нутгийн 1:1000-ны масштабтай байр зүйн зураг болон иргэн, хуулийн этгээдийн эзэмших, ашиглах, өмчлөх газрын кадастрын хэмжилт зураглалын ажлыг богино хугацаанд, өндөр нарийвчлалтай үйлдэх боломжтой боллоо.