ТӨРИЙН АЛБАНЫ ЗӨВЛӨЛИЙН САЛБАР ЗӨВЛӨЛИЙГ ГАЗАР ЗОХИОН БАЙГУУЛАЛТ, ГЕОДЕЗИ, ЗУРАГ ЗҮЙН ЕРӨНХИЙ ГАЗРЫН ДЭРГЭД БАЙГУУЛЛАА

 Монгол Улсын Төрийн албаны зөвлөлийн 2024 оны ээлжит 45 дугаар хуралдаан 2024 оны 12 дугаар сарын 11-ний өдөр болж, Төрийн албаны зөвлөлийн Салбар зөвлөлийг Засгийн газрын хэрэгжүүлэгч агентлаг-Газар зохион байгуулалт, геодези, зураг зүйн ерөнхий газрын дэргэд байгууллаа. 
Монгол Улсын Ерөнхий Сайдын 2024 оны  01 дүгээр сарын 23-ны өдрийн 14 дүгээр захирамжаар Засгийн газрын хэрэгжүүлэгч агентлаг-Газар зохион байгуулалт, геодези, зураг зүйн ерөнхий газрын үйл ажиллагааны стратеги, зохион байгуулалтын бүтцийн өөрчлөлтийн хөтөлбөрийг хавсралт ёсоор баталсан. 
Монгол Улсын Ерөнхий Сайдын харьяа Газар зохион байгуулалт, геодези, зураг зүйн ерөнхий газар нь зохион байгуулалтын 3 газар, 10 нэгж, 21 аймагт Газрын харилцаа, барилга, хот байгуулалтын газар, нийслэлд Газар зохион байгуулалтын алба гэсэн үндсэн бүтэцтэйгээр үйл ажиллагаа эрхэлж байна.
Газар зохион байгуулалт, геодези, зураг зүйн ерөнхий газар нь салбарыг нэгдсэн бодлого, удирдлагаар хангах, Монгол Улсын газрын нэгдмэл сан, газар зохион байгуулалт, газрын харилцаа, геодези, зураг болон орон зайн өгөгдлийн дэд бүтцийн талаар нэгдсэн бодлогыг олон улсад нэвтэрсэн техник технологи, инновацыг нутагшуулах, хууль тогтоомж, төрийн бодлогыг хэрэгжүүлэх, зохион байгуулах, төрийн хяналт, шалгалтыг хэрэгжүүлэх, Монгол Улсын нийт газар нутгийн бодит нөөц, чадамжид суурилсан салбар хоорондын уялдааг хангасан нэгдсэн төлөвлөлтийг боловсруулах, хэрэгжүүлэх, газрын нэгдмэл сангийн удирдлагын нэгдсэн цахим системийг хөгжүүлэх, хэрэгжүүлэх, байрлалд суурилсан орон зайн өгөгдөл мэдээллийн менежментийг нэвтрүүлж, дэвшилтэт техник, технологид тулгуурлан үндэсний орон зайн өгөгдлийн дэд бүтэц байгуулах асуудлаар мэргэжил, арга зүйн удирдлагаар хангах чиг үүргийн асуудал эрхэлсэн төрийн захиргааны байгууллага юм.
Газрын тухай хуулийн 23 дугаар зүйлийн 23.1-д зааснаар Газрын асуудал эрхэлсэн төрийн захиргааны байгууллага нь аймаг, нийслэл, дүүрэгт газрын асуудал эрхэлсэн алба, суманд газрын даамалтай нэгдмэл төвлөрсөн удирдлагын тогтолцоотой байхаар мөн хуулийн 23 дугаар зүйлийн 23.2.6-д “Засгийн газраас тогтоосон хязгаарт багтаан аймаг, нийслэл, дүүргийн газрын албаны бүтэц, орон тоог батлах”-аар хуульчилсан байна.
“Газар зохион байгуулалт, геодези, зураг зүйн ерөнхий газрын үйл ажиллагааны стратеги, зохион байгуулалтын бүтцийн өөрчлөлтийн хөтөлбөр батлах тухай” Монгол Улсын Ерөнхий сайдын 2024 оны 14 дугаар захирамжаар  Газар зохион байгуулалт, геодези, зураг зүйн ерөнхий газрын орон тоог 93 байхаар шинэчлэн баталсан.
Одоогийн байдлаар салбарын хэмжээнд нийслэл, дүүргийн Газар зохион байгуулалтын алба 245, аймгийн Газрын харилцаа, барилга, хот байгуулалтын газар 444, сумдад Газрын даамал 362, нийт 1144 албан хаагч, үүнээс төрийн захиргааны албан тушаалын 988, төрийн үйлчилгээний албан тушаалын 156 албан хаагч ажиллаж байна. 
Төрийн албаны зөвлөлийн 2022 оны 59 дүгээр тогтоолоор батлагдсан “Төрийн албаны зөвлөлийн салбар зөвлөлийн ажиллах журам”-д заасны дагуу Төрийн албаны зөвлөлийн Салбар зөвлөлийг дарга, гишүүн нийт 7 хүний бүрэлдэхүүнтэйгээр Газар зохион байгуулалт, геодези, зураг зүйн ерөнхий газрын дэргэд анх удаа байгуулан ажиллуулахаар шийдвэрлэлээ.