ЗҮҮН БҮСИЙН ГАЗРЫН ХАРИЛЦАА, БАРИЛГА, ХОТ БАЙГУУЛАЛТЫН ГАЗРЫН АЛБАН ХААГЧДЫГ ЧАДАВХИЖУУЛАХ СУРГАЛТ ЗОХИОН БАЙГУУЛАГДЛАА

Газар зохион байгуулалт, геодези, зурагзүйн ерөнхий газраас 2025 оныг “Иргэдийн итгэлийг хүлээсэн төрийн үйлчилгээний жил” болгон зарласантай холбогдуулан зүүн бүсийн аймгуудын Газрын харилцаа, барилга, хот байгуулалтын газрын албан хаагчдыг чадавхижуулах сургалт хоёр дахь өдрөө амжилттай зохион байгуулагдаж байна.

Сургалтын хүрээнд Газрын тухай хууль тогтоомжид орсон өөрчлөлтүүд, шинээр батлагдсан журам, аргачлалууд, газар зохион байгуулалт, кадастр, газрын мониторингийн чиглэлээр мэдээлэл өгч, иргэн хуулийн этгээдэд газартай холбоотой төрийн үйлчилгээг найдвартай, түргэн шуурхай үзүүлэхэд тулгамдаж буй асуудлуудыг хэлэлцэж, санал солилцлоо.

Мөн бүсчилсэн сургалтын хүрээнд Газар зохион байгуулалт, геодези, зурагзүйн ерөнхий газрын төлөөллүүд Хэнтий аймгийн газрын харилцаа, барилга, хот байгуулалтын газрын үйл ажиллагаатай танилцаж, аймгийн нийт албан хаагчид болон сумдын Газрын даамлуудтай уулзалт зохион байгууллаа.

Тус уулзалтаар сумын Газрын даамал болон ГХБХБГ-ын албан хаагчдын зүгээс цахим системийн үйл ажиллагааг сайжруулах, компьютэр, техник тоног төхөөрөмжийг шинэчлэх шаардлага үүссэн, хүний нөөц дутмаг, газрын даамлын нийгмийн баталгааг хангах зэрэг газрын харилцааны болон бусад чиглэлээр Хэнтий аймгийн хэмжээнд тулгамдаж байгаа асуудлууд, цаашид хэрэгжүүлэх арга хэмжээний талаар санал, бодлоо илэрхийллээ.

Түүнчлэн Хэнтий аймгийн хувьд 2025 онд 15 сумын хотын хөгжлийн ерөнхий төлөвлөгөө шинээр боловсруулах, тодотгох ажилд 3 тэрбум төгрөгийн санхүүжилтийг шийдвэрлүүлж, 2 сумын нутаг дэвсгэрийн хөгжлийн төлөвлөгөө боловсруулах ажлыг эхлүүлээд байгаа бөгөөд эдгээр ажлын үр дүнд аймгийн нийт сумд иж бүрэн төлөвлөгөөтэй болж 2026 оноос иргэдэд газрын эрх олгох үйл ажиллагаа хэвийн, саадгүй явагдах боломж бүрдэж байгаа талаар онцолсон юм.