СЭЛЭНГЭ АЙМАГ ОХУ-ЫН БУРИАД УЛСТАЙ ХАРИЛЦАН ХАМТАРЧ АЖИЛЛАНА

“Орос-Монгол-Шинэ бодит байдал дахь түншлэл” сэдэвт Олон улсын анхдугаар форум тавдугаар сарын 27-28-ны өдрүүдэд ОХУ-ын Буриад Улсын Улаан-Үд хотод зохион байгуулагдсан. 
Форумын хүрээнд сэдэвчилсэн уулзалт хэлэлцүүлэг, үзэсгэлэн худалдаа явагдаж, Монгол, Оросын 300 гаруй бизнес эрхлэгчид өөрсдийн бүтээгдэхүүнийг танилцуулсан юм. Энэхүү үзэсгэлэнд Сүхбаатар сумын бизнес эрхлэгчдийн төлөөлөл оролцож бараа бүтээгдэхүүнийг борлууллаа. 
Сэлэнгэ аймгийн Засаг дарга Н.Лхагвадорж тус форумын хөдөө аж ахуйн салбар уулзалтад оролцож Сэлэнгэ аймагтай хамтарч ажиллах боломж, давуу талыг танилцууллаа.
Аймгийн Засаг даргаар ахлуулсан Сэлэнгэ аймгийн төлөөлөл  ОХУ-ын Буриад Улсын Ерөнхийлөгч, Засгийн газрын тэргүүн Алексей Самбуевич Цыденов болон салбар яам, газар, аж ахуйн нэгжийн төлөөллүүдтэй албан уулзалт зохион байгуулж Эрүүл мэнд, Боловсрол, Хөдөө аж ахуй, Хил гааль, Бизнесийн салбарт харилцан хамтран ажиллахаар тохиролцлоо.
Онцолвол: 
-Хүн эмнэлгийн тусламж үйлчилгээ, оношлогоо, салбарын ажилтан ажиллагсадын хамтын ажиллагааг бэхжүүлж, туршлага судлуулан, сургаж мэргэшүүлэх,
-Буриадын нутаг дэвсгэр дэх их дээд сургуулиудад оюутан сурагчдын суралцах боломж нөхцлийг бүрдүүлж, орос хэлний багш нарыг үнэ төлбөргүй сургах, дотуур байранд үнэ төлбөргүй байлгах асуудлыг шийдвэрлэх,
-Хиагт-Алтанбулаг олон улсын авто замын шалган нэвтрүүлэх боомтын шалган нэвтрүүлэх ажлыг эрчимжүүлж Гаалийн постын хүчин чадлыг нэмэгдүүлэх,
-Монгол хүүхдүүдийг Хиагтын раойны сургуулиудад сургах, Монголд-Орос хэл заах зорилготой орос хэлний багш нарын автомашиныг олон улсын “Хиагт-Алтанбулаг” авто замын боомтоор нэвтрүүлэх асуудлыг шийдвэрлэх,
 -Сэлэнгэ, Орхон голын экологийн төлөв байдалд хяналт тавих асуудлаар хамтарсан ажлын хэсэг байгуулах,
-Мал эмнэлэг, халдварт өвчний эсрэг чиглэлээр хамтран ажиллах,
-“Тэрбум мод” үндэсний хөдөлгөөнийг дэмжих зорилгоор жил бүр нарсны суулгац нийлүүлэх,
-Соёл урлагийн салбарт хамтран ажиллаж харилцан урлаг соёлын арга хэмжээг зохион байгуулах,
-Бизнесийн төлөөллүүдтэй харилцаа холбоо тогтоож, мэдээлэл солилцон барилгын салбарын худалдаа үйлдвэрлэлийн цэг байгуулах, машин тоног төхөөрөмжийн эд анги нийлүүлэх болон бусад асуудлууд дээр хамтарч ажиллахаар харилцан тохиролцоод байна.